Kurtejiyana min

Li payîza welatê xwe ku niha kêliyên jiyana min bûne malzaroka êşên wê û tebata xwe bi serpêhatiyên axa wê tînim, li 4ê heyva 11 li sala 1988ê di hembêza bajarokê Tirbespiyê de ji dayîk bûm. Zarokatiya min, roj û demên gulgulî û yariyên zarokatiya min û hevaltiya min ya bi dilopê baranê re, bi leystikên tîrêjên rojê re a li ser axa dayika min derbas bûn. Lê, wek gelek malbatên kurd yê rojavayê kurdistanê, ez jî li gel malbata xwe bûm koçberê welatê xerîbiyê. Ev çend salin em li Almaniya niştecihin. Jiyana min di navbera çar dîwarên cemdî, xwendin, wêne û helbestê de derbas dibe. Li vî welatê dûrî çand, bêhin û evîna welatê min, wêne û helbest bûne zimanê min, bi taybetî wêneçêkirin bûye zimanê derûna min. Jibîr nekim, kesatiya diya min, rondikên wê, awirvedana wê, sirûda kenê wê bûye wêneke her kêlî ya eşqa welat li ber çavê min…Li vî welatî her roj birînên xwe bi bîranînên hesreta axê derman dikim, lê çi bikim her birîneke min ji birîna din re dibe dayik!

Montag, 8. Februar 2010

BAYÊ HESRETÊ

Canê Omer

Bayê hesretê


Li gel bayê hesretê

Hêvî têkdiçin

Asoyên hestan teng dibin

Stêrik ji bêdengiya te bêzar dibin

Û ez di nav sarxuhdana tayên dorpêçkirî de

Ser av û bin av dibim

Tune dibim

Xelekên bîranînên xwe sêdar dikim

Laşê min bi reşekonê mirinê dipêçe

Erê rojhilatiyo!

Dilê te tim bi wan payizan

Jiyan bê hest dikir

Bê wate dikir

Gelek demsalan te ez li pey dilê xwe yê mirî dibezandim

Gelek şevên sar

Te ez di xaniyên bê dîwar û bê pencere de dirazandim

Lê dilê siwarê hêviyên te

Rastiya hestên te yên xapînok naskirin

û îşev govenda mirina evîna te digerîne

îşev ez ê xwe ji gunehên şevên te bişom

min bîranînên te di warê jibîrkirinê de veşartin

û wêneyên te ji jêrzemîna dilê xwe avêtin..

erê bê bext

bê bextî nema kare min di nav hestên dilberan de dîl bike

here..

û hewil nede ez vegerim

min ji zû ve ferhenga derewên te ji ber dergehê dilê xwe rakir.

Eingestellt von um
Labels: ,

1 Kommentar:

  1. Rêwî Girpirî13. Mai 2010 um 20:58

    Li ber bayê hisretê te ey dilê şikestî çend birîndara ezê laşên wan lev bidim hev
    Ey dil ma nebese evîna bi azerîn û azer
    Bese dilê evîndar bese
    Cana delal
    Birastî dema ku merov derbasî van hestê tey delal di bê yek nema dizanê ger hest hewar di kin yan em hewarî hestan di kin
    Gelkî xweşin hestê te xwîşka hêja
    Serkeftin bo te û her pênûsa te sax bê
    Li gel silav û rêzê min
    Rêwî girpirî

    AntwortenLöschen

Abonnieren Kommentare zum Post (Atom)